Sîmge Yildirima ke bi waştişê perwerdeyê ziwanê dayîke tewrê çalakîya ''Ma bi hêvîye ver bi azadîye şinê'' bîye, vat waştişê înan komelkîkerdişê waştişê haştîye û baleantişê serê heqê perwerdeyê ziwanê dayîke yo.Yardime vat wextê ronayîşê komare ra nata Tirkîya de sîstemê perwerdeyî yo yewperest polîtîkaya asîmîlasyonî serê şaran de xorî keno.

Rayraşîyayîşê ''Ma bi hêvîye ver bi azadîye şinê'' yê Têgêrayîşê Cinîyan ê Azadan (TJA) yo ke 1ê teşrîna verêne de da destpêkerdene dewam keno. Cinîyê roja çarine de vizêr resayî Adana û tîya bi girseyî ameyî pêşwazîkerdene. Adana de rayraşîyayîşo biheybet ame kerdene û bi mîtîngê bi coşî qedîya. Çalakîye de cinîyan ke  sloganê sey "Jin Jiyan Azadî" vatî, azadîye Rayber Apoyî waşte.

250 cinîyê ke rayra şinê înan ra yew zî mamosta Sîmge Yildrima a. Sîmge Yildirima ke wextê raryaşîyayîşî de qisey kerd, ard ziwan ke semedê komelê demokratîkî heqê perwerdeyê ziwanê dayîke nêbo nêbeno û vat sîstemê perwerdeyî yê Tirkîya yewperestîye ser o ameyo ronayene û no serê şaran de polîtîkaya asîmîlasyonî xorî keno.

Sîmge Yildirim vist vîrî ke ê semedê haştîye rayra şinê û vat: ''Waştişanê ma yê bingeyînan ra yew zî xora waştişê perwerdeyê ziwanê dayîke yo. Nasnêkerdişê heqê perwerdeyê ziwanê dayîke verê demokratîkbîyayîş de astengo gird o. Heqê perwerdeyê ziwanê dayîke meseleyêka komelkî ya. Şarê ke ziwanê xo nêşuxulnenê vîr û kulturê xo zî vînî kenê.

Bitaybetî semedê qijan ê kênayan û ê ke ziwanê dayîke yê înan cîya yo muredato ke yeno rayraberdene, neheqîye keno. Naskerdişê heqê perwedeyê ziwanê dayîke yena manaya dezgehbîyayîşê haştîye. Ma cinîyê ke tesîrê şerî yê tewr xorî ciwîyenê serkêşîya prosesê haştîye kenê. Heqê perwerdeyê ziwanê dayîke waştişêkê haştîye yo. Seba qedînayîşê polîtîkaya asîmîlasyonî û ronayîşê komelê demokratîkî ganî no heq bêro naskerdene.''