Heyetê cinîyan ê Vakur û Rojhelatê Sûrîye ke Ewropa de rêzêk pêvînayîşî kerdî, xebatê dîplomasîye bi kombîyayîşêk ke bajare Aarauî yê Swîsreyî de ame kerdene, temam kerd. Kombîyayîşî de ke Komîteyê Têkilîyanê Teberî yê Merkezê Komela Kurdan ê Aarauî organîze kerd û bi seyan kesî beşdar bîyî, heyet rewşa peyêne ya Sûrîye îzah kerd.

Heyetê cinîyan ê Vakur û Rojhelatê Sûrîye ke Sereka Meclîsê Cinîyan ê Vakur û Rojhelatê Sûrîye Emîne Omer, Vervatoxa Meclîsê Cinîyan ê Sûrîye Muna El Yusif, Vervatoxa Komela Cinîyan a Zenûbîya Şehrezade El Casim, Endama Koordînasyonê Kongra Starî Jîyane Hisên û Îdarekara Yewîya Cinîyan a Suryanîyan Jorjête Bersûm ra pê ameybî, teqrîben yew aşme Belçîka, Almanya, Fransa û Swîsreyî de zaf sîyasetmedar, parlamenter, şaredar, temsîlkarê rêxistinanê cinîyan û cugehî û kurdan reyde rêzêk kombîyayîşî kerdî.

Kombîyayîşê heyetî yo peyên Swîsre de Merkezê Komela Kurdan a Aarauî de bî. Kombîyayîşî de ke Komîteyê Têkilîyanê Teberî organîze kerd temsîlkarê Komela Suryanîyan ê Turgîyî, Îdarekarê Partîya Sosyalîstan ê Offenes Antifaschistisches Treffen (OAT) Lenzburgî, aktîvîstê têgêrayîşê fêmînîstan û cugehî û endamê Mala Kurdî beşdar bîyî.

Nameyê heyetî ser o Îdarekara Yewîya Cinîyanê Suryanîyan Jorjête Bersûm derheqê pêşkewtişanê Sûrîye de pêşkêşîyêk kerd. Aye îfade kerd ke hukmatê Ahmed el Şarayî yê ke Sûrîye de badê rejîmê Baasî ame îqtidar, problemanê Sûrîye rê çare nîyo û vat: "Îdareyê Şarayî zî tam sey rejîmê Baasî yo. Çareserîya raştikêne Sûrîye de yew fehmo demokratîk ê bêmerkezî yo ke heme nasnameyê cîyayî bêrê nasbîyayene û cuya xo dewam kenê. Tecrubeyê 10 serran ê Îdareyê Xoserî yê Vakur Rojhelatê Sûrîye naye dano şarê Sûrîye. Ma sey cinîyanê Sûrîye şer nêwazenê."

Persa ke ameya persnayene "Tirkîye wazena ke QSD çekan verdo. Şima do çekan verdê?" Sereka Meclîsa Cinîyan ê Vakur û Rojhelatê Sûrîye Emîne Omer cewab da. Omere vat: "Qetilkerdişo ke hukmatê Colanîyî badê îqtidarîya xo elewîyan û dirzîyan rê kerd, ma ci zanê. Çek pawitişê ma yo. Eke ma çekan verdê, çîyo ke ameyo elewîyan ser o do bêro ma ser o zî."