Qewetanê Hukmatê Demkî yê Sûrîye vizêrî dormeyê taxanê Şêxmeqsûd û Eşrefîye yê Helepî girewt û hêrîş kerd.

Saete 17:00 de qewetanê hukmatê demkî pêro vejîyayîş û dekewtişê taxanê Şêxmeqsûd û Eşrefîye padayî. Verê ney zî rayîrê ke şonê her di taxan padaybî û barîyerê herre viraştbî. Dima qewetê hukmatî bi dronan hêrîş kerd û waşt ke bikewê her di taxan. Çekê giranî ardî taxan.

Na hareketîya talûkeyine ra dima Meclîsê Pêroyî yê Taxanê Şêxmeqsûd û Eşrefîye venga şarê taxan da ke vera padayîşê rayîran, bikewê kuçeyan û protesto bikerê.

Nê vengdayîşî ra dima şarê her di taxan kewtî kuçeyanê serekîyan û reaksîyonê xo yê dormegirewtişî mojna. Bi seyan şar kewtî kuçeyan vera qewetanê Hukmatê Demkî sloganî eştî ke rayîrê taxanê Şêxmeqsûd û Eşrefîye bêrê akerdene.

Qewetanê hukmatê demkî vera çalakgeran bi gazê çimveşnayeyî û guleyan hêrîş kerd. 25 kesî seba gazî ameyî berdiş bi nêweşxane.

Dima qewetanê hukmatê demkî bi tankan û wasitayanê zirxinann çar hetan ra waşt taxan ser o hêrîş bikero. Qewetanê Emnîyetê Zereyî zî cewab da û pêkewtişî bîyî.

Qewetanê hukmatê demkî bi wasitayanê zirxinan waşt bikewo her di taxan, 2 kesî şehîd bîyî û bi desan kesî birîndar bîyî. 

Şewe saetanê peyênan de qewetanê hukmatê demkî xo peyser ant û dormeyê her di taxan û herême de bêvengîye hakim bîye.

Goreyê melumatanê verênan 2 kesî şehîd bîyî, 60 ra zêdeyêr kesî birîndar bîyî.