Peygoşîya dewlete ya vera janê vîrusê Korona seba weşîya şarî û multecîyan bena gefêko pîl. Çend rojî verê cû Walîyê Wanî Mehmet Emîn Bîlmezî da zanayene ke welatanê cîyayan ra 3500 multecîyî ameyî Wan û înan de vîrusê Korona nêame tesbîtkerdene. Dima zî serekê AKPyî yê Wanî Kayhan Turkmenoglıyî vatbi ke 700 multecîyî gêrîyayî binê karantîna. Serekanê HDPyî û CHPyî yê Wanî îfade kerd ke îdarekarê dewlete raştîye şarî ra nimnenê.

Hemserekê HDPyî yê Wanî Okkeş Kawayî ard ziwan ke eşkerayîyê walîyê Wanî û ê serekê AKPyî vera yewbînan ê û vat: ''Heta ke IMFyî vat ma paştî danê welatanê ke vera vîrusê Korona têkoşîn kenê Tirkîya seke tede vîrus çin o têgêrîyaye. Destpêk de na raştîye şarî ra nimite. Zanayîşê derheqê vîrusî de nênê eşkerakerdene. Wan şaristanêk o ke binê rîskî de yo. Seba ke ma cîranê Îranî yê û multecîyî yenê şaristan de rîsk pîl o.''

Serekê CHPyî Mehmet Kurukçuyî zî vat: ''Hema zî multecîyî yenê Wan, no zî ma qerqilneno. Eke multecîyî karantîna de zî bibê seba ke ameyîşê multecîyan bêkontrol o, hûmara rastikêne zêdêr a.''