Komîteya Weşîye ya KCKyî derheqê pandemîya Covid-19î de eşkerayîyêke weşanaye. Komîte bale ante îmkanê kemî yê Kurdîstanî û qesawetê xo ard ziwan. Komîteya Weşîye venga şarî da ke tedbîranê xo bigêro û bi nê armancî seba tedbîranê pawitişî 12 madeyî pêşnîyaz kerdî.

Eşkerayîya Komîteya Weşîye ya KCKyî wina ya:

''Nameyê Komîteya Weşîye ya KCKyî ser o ma kedkaranê weşîye yê Kurdîstanî rê ke vera vîrusê Korona têkoşîn kenê bi rêzdarî selam kenê. Kedkaranê weşîye yê ke nê oxirî de ganê xo feda kerdî yad kenê û keyeyanê înan rê serweşîye wazenê. Hîrê parçeyanê Kurdîstanî de nêweşê Korona ameyî dîyene. Rojawan de hema nêweşîya Korona nêameye tesbîrkerdene. No nêno a mana ke uca de merdimî do pê vîrusî nêkewê.Wextê winasênî de Vakurê Kurdîstanî de şaredarîyê şarî pê rayîrê qeyûman ameyî xespkerdene. Eke şarê ma seba weşîya xo tebdîran nêgêro netîceyê bitehlukeyî do bivejîyê meydan.

Zîndananê dewleta tirke û Îranî de pakîye û îmkanê hîjyenî kêm ê coka seba veradayîşê Rayber Apoyî û tepişteyanê sîyasîyî ganî her kes bi berpirsîyarîye têbigêro.Seba ke netîceyê bitehlukeyî nêvejîyê werte ma neçare yê ke bidîsplîn têbigêrê. Ganî şarê ma goreyê tebdîran têbigêro, verî ke pabeyê hêzanê dewlete vinderê tebdîranê xo bigêro.Vera vîrusê Korona ganî şarê ma nêkewo xeflet, rewşe pey goş nêkero, qijkek nêvîno û bi vatişê 'ma rê çîyêk nêbeno' tebdîran sist mekero. Heyf ke pê tebdîranê kêman, peygoşîye ma xo û komelê xo bêpawitiş verdenê. Coka her karo ke na babete ser o yeno kerdene girîng o. Hetê hîjyenî ra ma neçare yê ke tebdîran bigêrê.''

Tedbîrê Pawitişî

Eşkerayîye de seba xopawitişê vera vîrusî nê tedbîrî ameyî pêşnîyazkerdene:

1-Heta ke neçare nêmanê mevejîyê teber

2-Ganî mekewê mîyanê qelebalixî, tewr tay 1-2 metreyan xo yewbînan ra dûr bigêrê

3-Cayanê sixletênan de ganî ma maske û lapikî bixebitnê. Eke maske nêkewte dest ganî her kes goreyê îmkananê xo maskeyêka pawitişî bivirazo, têna aye bixebitno û dezenfekte bikero.

4-Pakîya dormeyî, pakîya keyeyî, pakîya şexsî û pakîya cayanê hemparan bêra kerdene.

5- Her mazlemeyo ke teberî ra yeno ganî bêro pakkerdene.

6-Ganî merdimê kokimî û nêweşê kronîkî heta ke înan ra yeno nêvejîyê teberî, xo bi werdê bivîtamînî û proteînî xurt bigêrê û xo nêzdîyê merdimanê ke teberî ra yenê nekerê.

7-Ganî zaf awe bişimê û giranîye bidê werdişê meywe û sebzeyanê ke tede vîtamînê Cyî estê.

8-Ganî rojane spor bikerê û û xoverdayîya bedenî xurt bikerê.

9-Eke cayêk de şikê vîrusî estbo, her çî ra verî nêverdê ke vîrus dromeyanê bînan zî bigêro. Eke taxêke, dewêke yan zî keyeyêk de nîşaneya vîrusî ameye dîyene ganî her kes xo bigêro binê karantîna.

10-Ganî nê wextî de şarê ma wayîrê kedkaranê weşîye bivejîyo, goreyê hîşyarîyan têbigêro û paştî bido înan.

11-Ganî dezgeh, sazgeh, partî û kesayetê ke şarê ma tremsîl kenê pê hîşmendîyêka neteweyîye ya hempare têbigêrê û her parçeyanê Kurdîstanî de moral û motîvasyon berz bikerê.

12-Eke komel panîk bikero yan zî bi hawayêkê sistî têbigêro, peygoşîye bikero do bikewo rewşêka bitehluke. Ganî komelê ma panîk nêkero, xo seba rewşan amade bikero.