Kesêko ke 5 rojî yo ke pê şikê vîrusê Korona Wan de wedarîya nêweşxaneyî vat, doktor qet nêame hetê ey û bi nê hawayî nêame dermankerdene.

Goreyê doneyanê fermîyan Wan de 50 kesî pê vîrusê Korona kewtî û 7 kesî zî merdî. Wan û qezayanê ci de bi desan kesî pê şikê vîrusê Korona wedarîyayî nêweşxaneyan.

Wan de bi hawayêkê qîmî test nêno kerdene. Nêweşo ke 5 rojî yo pê şikê vîrusê Korona wedarîya nêweşxaneyî eşkera kerd ke odayêka yewkese de yeno tepiştene û vat: ''Ne doktor ne hemşîre ne zî wezîfedarê bînî ameyî odaya mi. Êyê ke nan anê ez înan zî nêvînena. Sey nêweşanê bînan nêzdîyê ma nêbenê. Merdimî nê cayî de rewşa weşîye ya înan baş zî biba atmosferê xirabî ra nêweş kewenê. Paştdayîşo psîkolojîk nêno dayene. Seke ma zîndan de tecrîd de yê.''