Endamê Komîteya Zîndanan ê PKKyî Pîro Dêrsimî derheqê qanûnê înfazî yê AKPyî û berpirsîyaranê rayaumûmîye de qisey kerd û cewab da persanê ma.

Qiseykerdişê Dêrsimî ra beşêk wina yo: 

''Sey her wextî rojdemê ma yo verên azadîya Rayberê ma yo. Nê prosesî de ganî têkoşîn sere dê ê Rayberîya ma de dormeyê tepişteyanê nêweşan de bêro geşkerdene. Sere de Rayberîya ma bi des hezaran embazê ma zîndanan de yê. Ma nêeşkenê Rayberîya xo ra xeberêke bigêrê 

Eşkera yo ke nê prosesî de embazê ma terkê mergî bîyî. Tepişteyî odaya hîrês kesan de senî eşkenê xo bipawê? Vejîyabi werte ke Hemşaredara Şemrexî Zîndanê Gumuşhaneyî de pê vîrusê Korona kewte. Mumkîn nîyo ke vîrus nêkewto zîndanan. Nika ma nêeşkenê vajê ke zîndan de kesêk/a pê vîrusê Korona nêkewt/e. Ma eşkenê vajê ke rewşa zîndanan zaf cidî ya.

Nika cayê tewr birîskî zîndan ê. Eke vîrus bireso uca bi hezaran kesî do bimirê. Tay welatan tepişteyî vera dayî. La Tirkîya de mesele kurd biba hukmatê AKP-MHPyî mergê tepişteyan sey ferz vîneno. Pê qanûnê înfazî zî AKP û MHP paştî danê cerganê xo. Ê têna fikirîyenê ke 'Wa kurdî bimirê, ma kesanê binan biverdê teber.'

Wina yeno fikîrîyenê ke pê na paketa înfazî ceza kêmîyena û na pakete seba tepişteyan a. La çîyo winasên çin o. Eqsê xi cezaya dîsîplînî zêdîyena. Goreyê na pakete heyetê çimdarîye yê zîndanî eşkeno derheqê tepişteyan de caardişanê kêfîyan bikero. No qanûn zaf probleman ano û zîndanan de alozîye zêdîneno.

Bi nê qanûnî 70 hezar tepişteyî do bêrê verdayene û 210 hezar tepişteyî do zîndan de bimanê. La kapasîteya zîndananê Tirkîya seba 200 hezar kesan o. Ganî sûcdaranê tecawuzî ra ber pêro tepişteyî bêrê veradayene. Sere de zî tepişteyê sîyasîyî.

Keyeyê tepişteyan, dezgehê demokratîkî, hunermendî û roşnvîrî hîsger ê la na qîm nêkena. Ganî xoverdayîş bêro rêxistinkerdene, ganî metod û rayîrê seba ney bêrê dîyene. Ganî partîyê sîyasîyî, keyeyê tepişteyî, dezgehê demokratîkî û komeleyê heqanê merdiman bêrê têhet û plansazîya çalakîyan bikerê. Avûkatê tepişteyan ganî bêveng nêvinderê. Ganî tewirê xurtî bêrê mojnayene.

Ma nika nêeşkenî Rayberîya xo ra xeberêke bigêrê. Ganî ma seba naye zî têbigêrê.Pê kampanyaya îmzayan na mesela safî nêbena, ganî bi hawayêkê aktîfî bêro têgêrayene. 

Rewşêka îstîsnayîye esta, coka ganî ma zî bi hawayêkê îstîsnayî têbigêrê. Ya ma verê nê prosesî gênê yan zî ma qetlîaman seyîr kenê. Embazê ma zîndan de mîyanê rewşêka çetine de yê. Ganî xeta xoverdayîşî bivejîya vernî. Ma zanenê ke ê wayîrê tecrube û xoverdayîşî yê û eşkenê xo bipawê û xo ver bidê.''