Tepişteyê Zîndanê Êlihî vera qanûnê înfazî 4ê nîsane de sere wedaritbi. 439 tepişteyî pê îşkenceyan erşawîyayî Zîndanê Amedî. Serdozgerîya Komare ya Êlihî derheqê tepişteyan de dest pê tehqîqatî kerd. Heta nika îfadeyê 220 tepişteyan pê SEGBÎSî ame girewtene. Tehqîqatê serdozgerîye de bira nimite zî ameye dayene. 

Tehqîqat de ame îdîakerdene ke nê kesan dest pê serewdaritişî kerd: "Ahmet Solmaz, Abbas Ayiş, Îdrîs Ayiş, Halîl Îbrahîm Oguzhan, Orhan Çelîk, Adnan Ekmen, Edîp Gol, Selman Omgan, Kasim Kasimoglû, Mesût Eme, Rasîm Kasimoglû, Abdurrahman Gorkem, Azad Îrge, Eşref Çîftçî, Ûgûr Cengîz, Nûrettîn Gultekîn, Mehmet Taymûr, Vedat Taymûr, Recep Kaplar, Ûgûr Ay, Bariş Uner, Bariş Ay, Veysel Gulsever, Rustem Taşar, Ahmet Çelîk, Yûsûf Alar, Nebî Ozer."

Derheqê 220 tepişteyan de ke sewqê Mehkemeya Cezaya Sulhe ya Êlihî bîyî, bi îdîaya ''zerar dayê malê umûmîye,  nêverda ke wezîfedarî karê xo bikerê, serewedaritişî'' bira tepiştişî ameye dayene.

Yeno vatene hûmara kesanê ke derheaê înan de bira tepiştişî dîyaye beno ke zêdêr biba.