Hemsereka Partîya Herêmanê Demokratîkan (DBP) Salîha Aydenîz vat ambargoyê vera Kampa Mexmûrî xizmetê dewleta tirke ra ber nêno manayêke.

17ê temmuza 2019î ra nata Îdareyê Hewlêrî Kampa Şehîd Rustem Cûdîyî girewt binê ambargoyî Kampa ke bi hezaran kesî tede yê, peydakerdişê dermanan de zorîyan ancena, nê zorîyî tehlukeyê vîusê Korona zêdînenê. Hemsereka DBPyî Salîha Aydenîz derheqê ambargoyê Mexmûrî de ANFyî reyde qisey kerd.

Aydenîze vat: ''Şarê ma rîyê zorbazîya dewleta tirke ra koçê Mexmûrî kerd. Ganî hukmatê Herêma Kurdîstanî dişmenîya dewleta tirke ya kurdan û hewceyê yewîya şarê kurdî bivîno. Wextêkê dergî ra nata Mexmûr ser o ambargo esto. Ganî no ambargo cade bêro wedaritene.

Wextêkê winasênî de ke pêro dinya vera vîrusê Korona têkoşîn kena ambargoyê vera Mexmûrî yeno manaya tepiştişê şarî, derba vera têkoşînê şarê kurdî. No nêzdîbîyayîş xizmetê şer û huqûqê dişmenîye yê dewleta tirke keno. Eke şarê Mexmûrî nêeşkeno hewcedarîyanê xo peyda bikero no hetê ma ra nêro qebulkerdene. Kurdîstan yew o, pawitişê na yewîye yê vera dişmenanê kurdan wezîfeyê ma yê pêroyînan o. Ma sey DBP partîyêk a ke seba yewîya neteweyî berpirsîyarîya ma esta. Şarê ma ewro berpirsîyarîyêke û wezîfeyêko tarîx vet verê ma. Coka meseleyêka her kurdî meseleya ma ya. Seba wedaritişê ambargoyê Mexmûrî ma do paştî bidê û seba naye xebata xo dewam bikerê.''