Vervatoxa Meclîsê Cinîyan ê HDPyî Ayşe Acar Başaran hetê cinîyan û kedkaran ra tedbîrê vera vîrusê Korona ercnayî.

Başarane vat: ''Wexto ke derheqê vîrusî de ameyêne qiseykerdene munaqeşeyî nêameyî kerdene û tedbîrî nêameyî ercnayene. Tirkîya wina têgêrîyaye ke seke qet vîrusî ci rê tesîr nêkerd. Îqtîdar bi hawayêkê bêcidîyetî nêzdîyê mesele bi.''

Başarane vist vîrî ke prosesê mendişê keyeyî de şîdetê vera cinîyan zêdîya. 

Başarane vat: ''Têna hetê kolonya ra paştdayîş ame kerdene. Naye ra berî seba kedkaran û karkeranê ke neçare bixebitê tedbîr nêame girewtene, paştî nêame dayene. Êyê ke îmkanê ci estê, rewşa înan a ekonomîke baş a keye de manenê la no proses seba xizanan vurîya rewşêka zaf zore. Nê prosesî tewr zaf tesîrê cinîyan kerd. Cinîyê ke zafê înan xizan ê ya karî ra ameyî vetene yan zî neçare veradîyayî ke bixebitê. Nayer ra cinîyî hîna xizan bîyî. Wexto ke ke vengdayîşê 'keye de bimane' ame kerdene raştîya keseba cinîyan zaf bitehluke ya sey çin ameye hesibnayene. Seke yeno zanayene zafe serebûtê şîdetî hetê merdimanê înan ra yenê kerdene. Wextê janî de, şer û afetê xozayî de serebûtê şîdetî yê vera cinîyan zêdîyenê.

Ma nêşorê teber zî, rastê yewbînan nêrê zî ganî ma paştdayîşê xo xurt bikerê.''