Endamê Komîteya Merkezî ya PKKyî Cemal Şerîkî bi wesîleya rojbîyayîşê Rayberê Şarê Kurdî Abdullah Ocalanî ANFyî reyde qisey kerd û tay babetî ercnayî.

Şerikî vat: ''Ez 4ê Nîsane yê Rayber Apoyî, şarê kurdî û pêro merdimîye fîraz kena. Ma bawer kenê ke 4ê Nîsane pê azadîya Rayber Apoyî do bêro pêşwazîkerdene. Ma nê esasî ser o têkoşîn û xîret bikerê. Rayber Apoyî pêvînayîşê xo yê peyênî de eşkera kerd ke ganî ma 4ê Nîsane senî fîraz bikerê. Ewro koyan de gerîlayî nê fermanî se ro têkoşîn kenê. Şertê ke ma mîyanê ci de yê mojnenê ke pê geşkerdişê têkoşînî yê azadîya Rayber Apoyî ma eşkenê 4ê Nîsane fîraz bikerê. Heta ke Rayber Apo azad bibo û tecrîd bêro wedaritene ma do nê esasî ser o rojbîyayîşê Rayberî pêşwazî bikerê. Verê cû zî rojbîyayîşê Rayber Apoyî her ca de bi coşêkî ameyêne fîrazkerdene. Darê neweyî ameyêne ronayene. Nê serran de zî no mîras dewam keno. No yeno manaya ganîbîyayîşê cuye û seba destvistişê cuya azade zî ma rê beno perspektîf. Rayber Apoyî tim bi hawayêkê cîyayî her hêla cuye seba têkoşînê azadîye hol ercnaye. Ewro zî wina keno.

Dewleta tirke hêrişê xo rîxmê vîrusê Korona zî Rojawan de Başûr de zî zêdînayî. Vakurê Kurdîstanî de hêrişê ci yê sîyasî zî dewam kenê, her roje bi desan kesan destbend kena û erzena zîndanan. Dewleta tirke estbîyayîşê xo îmha û înkarê kurdan ser o na ro. Seba ke kurdan îmha bikera çi destê ci ra yeno kena. Dewleta tirke pêro pêvînayîşî sey çareserîya demokratîke ya dewaya kurdan nê, parçeyêkê şerê taybetî ercna. Nê wextan de hêrişê xo zêdînayî. Serranê 2010-2011î de naye ra hêrişê co zêdînayî. Serra 2012î ra dima her cayê Kurdîstanî de kalekolî, awbendî û rayîrê leşkerîyî viraştî. Hêrişê xo zêdînayî.

Gerîlayê Kurdîstanî koyan de xo ver danê û cewab danê nê çîyan. Başûr, Rojawan û Rojhelat de şarê kurdî wayîrê raştî û nasnameyê xo vejîyeno. Rayber Apo Îmrali de destanêkê xoverdayîşî nuseno û cewabê nê hêrişan dano. Nka ra pey zî no cewab do bêro dayene. Eke wina nêbiyêne rojbîyayîşê Rayber Apoyî nêameyêne pêşwazîkerdene. Êyê ke wazenê rojbîyayîşê Rayber Apoyî pêşwazî bikerê ganî na raştîye ser o têbigêrê.

Dewleta tirke ewro tengasî de ya. Hêrişê xo yê vera şarê kurdî zêdînena la reyna zî nêeşkena raştîye bivurna. Nêeşkena ke nê hêrişan ra netîce bigêra. Gerîlayê azadîye cewabanê manadaran do bidê. Şarê kurdî nê esasî ser o do têkoşînê xo dewam bikero. Dostê kurdî û zerrîwazê têkoşînê azadîye yê kurdîstanî zî selamkerdişê Rayber Apoyî dewam bikerê. Ez reyna rojbîyayîşê Rayber Apoyî fîraz kena. Hêvîdar a ke 4ê Nîsane do seba şarê kurdî û merdimîye û pêro dinya zî fîraz bibo.''