Pê fermanê Wezaretê Karanê Zereyî Şaredarîya Mûşî de ke binê îdareyê AKPyî de ya, 3 endamê HDPyî yê meclîsî wezîfe ra ameyî dûrvistene. Bira ke Faruk Yildirim, Necîp Arslanşen û Fîkrî Aksak rê ameye teblîxkerdene semedê bire nêame eşkerakerdene. Şaredarîya Meclîsî 11 HDPyîjan, 19 AKPyîjan û yew zî endamê/a xoserî/a ra ameyêne meydan.

Hemserekê HDPyî yê Mûşî vera bire nêrazîbîyayîşê xo mojna û vat: ''Embazê ma bi hawayêkê bêhuqûqî û bîlasebebî wezîfe ra ameyî dûrvistene. Pêro dinya vera vîrusê Korona têkoşîn keno la îqtîdar huqûqê dişmenîye ano ca û endamanê HDPyî wezîfe ra gêno. Ma na bire qebul nêkenê û do her ca de vera ci bivejîyê.'' 

 Weçînayîşê 31ê Adare de zî namzetê HDPyî Sirri Sakik vera netîce nêrazîbîyayîşê xo mojnabi û îfade kerdbi ke tay reyê ci batal bîyî. La rîxmê îtîrazanê ey zî Şaredarîya Mûşî têna pê 593 reyanê zêdêran hetê AKPyî ra ameye girewtene.