Dêrsim de Festîvala Kultur û Xoza ya Munzurî bi şîarê ‘’Dêrsim cu ya; Destê xo medê ziwan, bawerî, îrade û xozaya mi’’  dewam kena. Vizêr zî çarçewa festîvale de xeylê aktîvîteyî ameyî kerdene.

Qezaya Pulirî de bi sernameyê ‘’Talanê Xoza, Texrîbkerdişê Ekolojî û Madenkarîye’’ panelêk ame kerdene. Hemşaredara Dêrsimî Bîrsene Orhan zî tewra panelî bîye. Panel de qiseykerdoxan da zanayene ke têkoşîno ekolojîk heman wextî de têkoşînêko antî-emperyalîst o. Qiseykerdoxan venga şarê Dêrsimî û rêxistinan da ke vera karanê madenkarîye têkoşîn bikerê.

Qezaya Xozatî de Parka Cem Emîrî de bi dahol û zurnayan şayîye ameye kerdene. Dima Merkezê Kulturî yê Hasan Saltikî de kayê domanan ame mojnayene û derheqê xoza û ekolojî de panelêk ame kerdene.

Merkezê Dêrsimî de, Kuçeyê Hunerî de bi kirdkî û kirdaskî şîîr û hîkayeyî ameyî wendene. Xeylê kesî beşdarê aktîvîte bîyî.

Peynîya roje de bi pankarta ‘’Destê xo medê xoza, awe û herra mi’’ rayraşîyayîşêk ame kerdene. Rayraşîyayîş de sloganê sey ‘’Ma do bi xoverdayîşî ser bikewê’’ ameyî vatene.

Dima Meydanê Cumhurîyetî de konserêk dîya. Konser de Zeynepe Bakşî, Yilmaz Çelîk, Ozan Serdar, Delîl Hidir, Huseyîn Guneş, Mehtape Durma û Şenol Akdag vejîyayî sehne ser. Konser bi govendan dewam kerd.