Azadbîyayîşê sîyasetmedaro kurd Mehmet Çakasî bi şertê 5 serrî serbestîya bikontrole bî. Almanya de hema zî seba muracatê îltîcayî red bîyo û destûrê roniştişî çin o û Tirkîya rê talukeyê sînorkerdişî dewam keno.

Girseyo ke serê sibayî ra zîndanî ver pawîtêne bi kilaman govende girewte. Seba pawitişî Hamburg, Hannover û bajaranê bînan ê Almanya ra kurdî ameybî pêser. Mîyanê înan de hemserekê KON-MEDî Kerem Gok û hemserekê FED-DEMî Hekîme Yûsif û Latîf Karakaş zî est bîyî.

Hemserekanê KON-MED û FED-DEMî qiseykerdişanê xo de bale ante kampanyaya aşman ê vera talûkeyê sînorderkerdişê Mehmet Çakasî ser o û polîtîkaya Almanya ya zordestîya vera kurdan protesto kerd.

Gokî vat: "Bi qeweta xo ya xoverdayîşî ma do naye bivurnê. Embazê ma Mehmet zîndanî ra vejîya labelê hema gelekî embazê ma zîndanan de yê."

Aktîvîsta almane ya cinîye Sofîe zî qisey kerd û vat kampanya bi cehdê pêroyî bi serkewtiş ameye ramitene.

Mehmet Çakasî her kesan rê ke ameyo û cehd kerdo, sipas kerd, bale ante ke kampanya tena yew kesî rê nêameya ramitene.

Çakasî vat: "Na xebatêka seba huqûqî û netîceyî bîye. Însan çîyêk ra bawer bikero û cehd bikero tira netîce gêno. Kurdî êdî kurdê kehenî nîyê, kurdî xurt ê. Dewleta almane ganî naye fahm bikero û xo bivurno. Ma şarêk ê ke bi komelê demokratîkî û felsefeyê jin jiyan azadî rayîr şinê. Heta embazê ma yo peyên û Serok Apo vejîyê têkoşînê ma do dewam bikero."

Qiseykerdişan ra dima şîranî ameye vilakerdene û Mehmet Çakas bi keyeyê xo ver bi Hamburgî kewt rayîr.

Mehmet Çakas badê ke muracatê îltîcayî Almanya de red bîbî, şîbî Îtalya û uca reyna muracat kerdbî. Labelê hewteyêk vernîya muhakemeya xo ya yewine, bi sebebê Bulteno Sûr ê Interpolî ya Almanya Îtalya de amebî tepîştene. Nêzdîyê 4 aşmî zîndan de mend, kanûna 2022 de Almanya rê ame îadekerdiş.

Çakas Almanya de bi îthamê endamîya PKKyî bi madeyê 129b yê Qanûnê Cezayan muhakeme bî. Nîsane 2024 de hetê Dadgeha Berze ya Eyaletê Celle ra 2 serrî 10 aşmî cezaya zîndanî girewte. Di aşmî mendbî ke cezayî biqedîyo, bi sebebê "destûrê roniştişî çin o" û "muracatê îltîcayî red bîyo" qerarê îadeyî yê Tirkîya ame dayene. Îade 28ê tebaxe 2025 de do bibîyêne. Labelê reaksîyonê raya pêroyî ra dima, Dadgeha Luneburgî 27ê tebaxe de no qerar "demêk" vinderna û muhakemeya newîye taloqê 24ê teşrîna diyine 2025 kerd.