Koordînasyonê RAJINî beyanatêk vila kerd "Rêça Gurbetellî Ersoz de ke çekuyan resnena raştîye, ma perdeyê tarîtîye akenê". Beyanatî de ame vatene: "Tarîx, goriştanê cinîyan o ke çiqas keda înan însanîyet û komelî ser o girs bo zî nameyê înan nêyeno yadkerdene. La tarîxê însanîyetî de bi cinîyanê ke eke nameyanê înan nêro yadkerdene zî, têkoşînê azadkerdişê cinîyan yew bi yew ameyo munitene. Labelê tayê cinîyan vera nê tarîxî sere wedarito û nameyê xo bi herfanê zêrrnênan nuşto. Gurbetellî Ersoz tena tarîxê Tirkîya û Kurdîstanî nameyê xo nênuşt, vera înkarê şarê xo de zî sere wedarna.

Cuya têkoşînî

Akademîsyene, zanaye, rojnamegere, raybera yewine ya pêroyîya çapemenîye ya cinîyan a Tirkîya û Kurdîstanî, şorişgere, cinîya azade Gurbetellî Ersoz 1997î de şewe mabênê 7-8ê teşrîna verêne de, damêk de ke KDPyî viraşt, bi tankanê Tirkîya, Kurdîstanê Başûrî de bi grûbêkao embazanê xo reyde şehîd bîye.

Gurbetellî 1965î de Xarpêt de Palû de ameye dinya. Unîversîteya Çukurova de Bêşê Kîmya de wend, lîsanso berz kerd, sey xebatkara cigêrayîşî xebitîyaye. Nê demî de Çernobîl (1986) û Qirkerdişê Helebçeyî (1988) ra pey cuya xo de dest bi perskerdişan kerd. 1989î de seba fikranê xo yê polîtîkan ame destbendkerdene, îşkenceyê giranî dîyî. Zîndan ra pey 1993î de Rojnameyê Ozgur Gundemî de bîye Raybera Pêroyî ya Weşanî û tarîxê têkoşînê cinîyan ê Tirkîya de ca girewt, bîye raybera yewine ya cinîyan a weşanî. Rojê aye bi akerdişê perdeyê tarîtîye ke Kurdîstan ser o yo, pirr bîyî, bi desan muhabîr û vilakerê rojnameyî ameyî qirrkerdene. 1993î de rojname de bîye hedef û a ameye destbendkerdene, 1994î de ameye veradayene labelê şertê rojnamegerîye nêmendî, 1995î de têkoşînê xo berd koyan. Bi agêrîyayîşê welatê xo û qerardayîya xo ya têkoşînê Kurdîstanî de êdî Gurbetellî ney, Vatenanelî bîye.

Têkoşîno domdar

Cuya xo reyde bîye sembolê têkoşînê Têgêrayîşê Azadîya Kurdî û nasnameyê Cinîya Azade. Rojnamegerîya xo reyde bîye cîgêrayoxêka hêzdare ya raştîye. Rojname bi sloganê "Raştîyî tarîtîye de nêmanenê" dest bi weşanî kerd, "Însanîyet yeno antene" manşet û fotografan reyde raştîyî eşkera kerdî, rojname bombekerdiş ra pey bi manşetê "No adir şima zî veşneno" weşanîya û bî sembolê xoverdayîşî.

Gurbetellî çekuyî resnayêne raştîye, berpirsîyarîya xo ya tarîxî ya ê demî ard ca û weşanayîşêko tesîrdar kerd ke raştîyî resnayî roşnîye û qebulkerdişê kurdan de rolêko muhîm kay kerd. 32 serran ê cuya xo de zaf çîyî resnayî cayê înan. Bi meşaleyêk ke çapemenîya cinîyan de berz tepişt, bîye pêşengê çapemenîye. Embazanê aye aye ra dima serrgêra şehadetê aye kerd Roja Rojnamegeranê Cinîyanê Kurdîstanî.

Nika seyan cinîyî bi kamera, makîneya fotografan, vatiş û nuşteyanê xo reyde rêça Gurbetellî Ersoz de cîgêrayîşê raştîye dewam kenê, xoverdayîşî xurt kenê. Dezgehbîyayîşê xo yê taybetî, televîzyon, rojname, kovare, radyo û platformanê dîjîtalan reyde serdestîya camêrdan pers kenê, qatîlanê kastîkan teşhîr kenê, îqtîdarî parçe kenê, bi komelîbîyayîşê cinîyan têkoşînê azadîye dewam kenê.

Ma sey RAJINî Gurbetellî Ersoz ra dima, bitaybetî şarê kurdî û heme şarê bînî û cinîyê ke nêasenê, ma sey vîr û vengê înan, qerardar ê ke çapemenîya azade ke aye viraştbî, bidomnê û xurt bikerê. Ma reyna soz danê ke ma do îdealê şehîdanê xo Şîlane Baqî, Şevîne Bingol, Gulnaze Ege, Ayfere Serçe, Denîz Firat, Nujîyane Erhan, Dilîşane, Dilovan, Nagîhane Akarsel, Emîne Demîr, Gulîstane Tara, Hero Bahadîn, Cîhan Bîlgîn û bi desan şehîdanê xo resnenê ca.

Bi şiûrê berpirsîyarîya tarîxî ya çapemenîye ma do awankerdişê komelê demokratîkî de têkoşînê cîgêrayîşê azadîye û raştîya cinîyan bidomnê. Bi nê munasebetî ma bi heme xebitkaranê cinîyan ê çapemenîye ke rêça rastîye de şonê, Roja Rojnamegeranê Cinîyanê Kurdîstanî piroz kenê.