Heyetê Cinîyan ê Vakur û Rojhelatê Sûrîye destpêkê êlule de seba munaqeşekerdişê rewşa Sûrîye, averşîyayîşê Vakur û Rojhelatê Sûrîye û bi pêroyî rewşa cinîyan şî Ewropa. Heyet gelekî bajaranê Ewropa de bi sîyasetmedaran, aktîvîstan, rêxistinanê heqanê însanan û huqûqî, şarê kurdî yê Ewropa reyde kom bî û dima şî Swîsre.

Panelo ke heyetî bajarê St. Gallenî yê Swîsre de organîze kerd, parlamenterî, aktîvîstê cinîyan û şarê kurdî beşdarê ci bîyî. Panelo ke nêzdîyê 2 saetî dewam kerd, beşdaran heyetî reyde rewşa Sûrîye, bi taybetî rewşa Vakur û Rojhelatê Sûrîye, rewşa û tecrubeyê cinîyan û sîstemê adem-î merkezkî û demokratîkî ke ganî Sûrîye de bêro tatbîqkerdene munaqeşe kerd.

Heyet nê endaman ra yeno pê: Endama Meclîsê Cinîyan ê Sûrîye Emîne Umer, Hemsereka Meclîsê Cinîyan ê Sûrîye Mûna El-Yûsif, Vervatoxa Komela Cinîyan a Zenûbya Şehrezade El-Casim, Endama Koordînasyonê Kongra Starî Jîyane Hesen û Hemsereka Yewîya Cinîyan ê Suryanîyan Corcete Bersum.