Meclîsê Cinîyan ê Komeleyanê Elewîyan ê Demokratîkan (DAD)  bi şîarê ''Heqîqet Rayîrê Ana yo'' Dêrsim de Komxebeta Anayan organîze kerde. Komxebata ke dewa Marçikî ameye  kerdene Hemsereka Pêroyî ya DBPyî Çîgdeme Kiliçgun Uçar, temîlkarê rêxistinanê komelê sîvîlî û partîyanê sîyasîyan û xeylê kesî tewrê ci bîyî.

Qiseykerdişê akerdişî hetê Hemserekê Pêroyî yê DADÎ Kadrîye Dogan ra ame kerdene. Dogane ard ziwan ke xeylê wext o ke vateyê cinîyan elewîyan û Anayan peyde maneno û vat eslê ocagan ana yî. Anayî kiriştoxê heqîqetî yê. Kadrîye Dogan vat: '2Elewîtîye rixmê heme zextan ciewîyena. No zî hêzê bawerîya ma yo. Ma her ca de bawerîya xo bidi ciwîyayene.''

Roniştişo ke moderatorîya Hulya Bozkurtî de bi  sernameyê “Raa/Rêya Heq bawerîya elewîyan de cinî‘ ame kerdene, Edibe Şahîn qala bawerîya elewîyan kerd. Edibe Şahîn vat: ''Ma raştê hendê asîmîlasyonan ameyî ke ma hinî yewbînan ziwanê xo yê dayîke de zî fam nêkenê. Ewro ma Dêrsim de derheqê bawerîye de munaqeşe kenê, werîkna ma no ziwanê xo yê dayîke de bikerdêne. La hem serdestan hem zîhnîyetê nêrî no ziwan û bawerî asîmîle kerd.''

Ana Fîdan Yildiz zî ard ziwan ke ê ameyî herra heqîqetî û vat: ''No rayîr do vînî nêbo. Cinîyî do newera nê rayîrî înşa bikerê.''

 Anaya Ocagê Seyît Derweş Cemalî Cevahîr altunok zî vat: Gerek ma xo û dewanê xo bipawê. Ma na bawerîya qedîme bidê ciwîyayene û wayîrê ci bivejê.

Ana Menşure Dogan zî vat: ''Ma goreyê domananê xo dahîna bişans ê. Ma rituelanê girdanê xo rê şahîdîye kerdene la domanê ma nînan rê şahîdîye nêkenê. Rayîrê ma rayîro rind o. Rayîrê haştîye, wayûbiratîye û heskerdişî yo.''

Ocagê Baba Mansurî ra Ana Elif Hurustan zî vat: ''Ma pêro pîya sey anayan verê xo bidê zîayretanê xo. Pîya bi domananê xo rayra şirê. No rayîr rayîrê heqîqetî yo, rayîrê Ana Fatma yo. Pêro qala pîran kenê, çew qala anayan nêkeno. Ma cinîyan reyde rayra şirê.  Nebo ma vînî benê. Hinî bes o wa haştîye û wayûbiratîye bibê. Ma cinîyî şerî nê haştîye wazenê.