Bi wesîleya 25ê Teşrîna Peyêne Roja Têkoşînî ya Mîyanneteweyî ya Vera Şîdetê Serê Cinîyan xeylê bajaranê bînan ê Kurdîstan û Tirkîya de cinîyî vera şîdetî vejîyayî waran û bi slogananê “Jin, jiyan, azadî” mesajê xoverdayîşî dayî.

Amed de serkêşîya Têgêrayîşê Cinîyan ê Azadan (TJA) de çarçeweya 25ê Teşrîna Peyêne de çalakîye ameye kerdene. Rayraşîyayîş verê Zîndanê Kahanî de dest pêkerd û verê AZC Plaza de bi eşkerayîye qedîya.

Çalakîya ke bi hezaran cinîyî tewrê ci bîyî sloganê“Jin, jiyan, azadî” ameyî vatene, fotografê cinîyê ke ameyî qetilkerdene  ameyî kiriştene. Eşkerayîye de vera şîdetê dewlete û camêrdî nêrazîbîyayîş ame mojnayene û bale ameye ser antene ke qirkerdişê cinîyan polîtîk o.

Aktîvîsta TJA Sebahate Tuncel  şîdetê vera cinîyan  ke zêdîyeno şermezar kerd û vat qanûnê ke azadîya cinîyan esas genê hewce kenê. Tuncele vat: ''Ma do komelê demokratîkî bi azadîya cinîyan înşa bikerê.''

Vervatoxa DEM Partî Ayşegule Dogan zî bale ante zextê serê ziwanî û vat têkoşînê cinîyan ê kurdan bedilnayîşê komelkî de rolo muhîm kay keno. Dogane semedê haştîya mendî û seyyewbînî veng da.

Reyna Îstanbul, İzmir, Adana, Şirnex, Mûş,  Silopi Sêrtt, Êlih,  Colemêrg, Agirî, Igdir, Wan, Bêtlis, Erzirom, Qers, Mêrdîn  û xeylê bajaranê bînan de zî çarçeweya 25ê Teşrîna Peyêne hetê TJA, rêxitinanê cinîyan, sendîka, baro û rêxistinanê komelê demokratîkî ra çalakîyî ameyî kerdene.

Eşkerayîyan de vera şîdetê camêrdan û polîtîkayanê kêman ê dewlete vengdayîşê têkoşînê hemparî ame kerdene. Rêxistinanê cinîyan bale ante şîdetê vera cinîyan ke zêdîyenê û merganê şikkerdeyan ser û waşt wa cipersayîşê bitesîr bêrê kerdene û edalet, seyyewbînî û cuya bêşîdete waşte.