TJA 250 cinîyan reyde bi şîarê "Bi hêvî ver bi azadîye rayîr şinê" Ankara rayîrşîyayîşêk da destpêkerdene. Bi pankartê "Heqê hêvîye nêeşkeno bêro astengkerdene" Amed de hezaran kesan reyde dest pêkerd, dima grûbe resaye Xelfetîye. 7 waştişan reyde kewtî rayîr û 7 bajaran de beyanatan reyde waştişanê xo do îfade bikerê. Fînalê xo zî do meclîsî de bikerê.

Hatîce Yildiz: "Heqê hêvîye seba Birêz Ocalanî ferz o. Ocalan zî seba şarê xo ferz o. Wan ra ma ameyî Amed, tîya ra ma do şêrê Ankara. Meclîsî ver de şarê Tirkîya rê mesajêk do bidê. Eke ma azadîye, haştî û edaletî wazenê, tirkî zî, kurdî zî ganî destê xo dekerê binê kerra. Dewrê şerî qedîya. Şarê Tirkîya zî ma zî êdî nê şerî nêwazenê."

Done Gevher (KESK): "Zafîya qismê komelî de vengdayîşê haştî û komelê demokratîkî est o. Labelê no vengdayîş tena roniştişan reyde ney, aktîvîte û çalakîyan reyde komelkîbîyayîş reyde eşkeno cewab bigîro. Seba ney ma Amed ra heta Ankara rayîrşîyayîş da destpêkerdene."

Oznure Evîn: "7-8 aşmî yo prosesêk yeno ramitene labelê zaf hedî şono. No proses ganî lez bibo. Komel êdî hetê şerî de nîyo, hetê haştîye de yo. Amancê ma vindertişê şerî, temînkerdişê haştîya komelkî yo. Eke peymana haştîya komelkî biba, do destê cinîyan ra bibo. Cayê cinîyan haştîye de zaf muhîm o."