Meclîsê Cinîyan ê Komeleyanê Elewîyan ê Demokratîkan (DAD)  bi şîarê ''Heqîqet Rayîrê Ana yo'' Dêrsim de Komxebeta Anayan organîze kerde. Hemsereka Pêroyî ya DBPyî Çigdem Kiliçgun Uçar roniştişê çarinî de qisey kerd.

Çigdem Kiliçgun Uçar bi pîrozkerdişê  serrgêra Şorişê Rojawanî  dest pê qiseykerdişê xo kerd û nê vatî: ''No wexto ke ma tede yê bertengêko tarîxî yo. Ya seserra ka ma ciwîyayî ma eynî sey ci reyna ciwîyene ya zî  bi berpirsîyarîya ke nê îtîqatî ma baro kerdo, ma pêro pîya  cuyêka newî, seserrêka newî înşa kenê.''

Çigdem Kiliçgun Uçar bale ante rolê tarîxî yê cinîyan elewîyan ser û nê vatî:'' Kulturê ocakan bi keda cinîyan bîyo pîl, bi destê cinîyan şeklê xo girewt. Ocakî têna merkezê bawerîye nîyê, eynî wextî de merkezê xopawitişî, paştdayîş û perwerdeyî yê.''

Çigdem Kiliçgun Uçar ard ziwan ke elewîtîye bi awanîyanê sey Serekîya Cemxaneyî yê dewlete nîna pênaskerdene û vat: ''Elewîtîye gureyê zerrî yo. Tewirê cuyeyêka bi xoza û kaînatî ya. Vernîyazê masa, sandalye, boyekerdişî yê dewlete goreyê ruhê nê îtîqatî nîyê. Ma tehtîdêk nê alternatîfêk temsîl kenê. Sîtemo ke cinî û camêrd seyyewbînî yê, bawerîye cayê yewbînan de yê mumkun o. Sîstemêk hewce keno ke tede pêro şarî bi nasnameyê xo ca bîgirê.''

Çigdem Kiliçgun Uçar ard ziwan ke polîtîkayê vera kurdan û cinîyan eynî merkezî ra xo weye kenê û wina vat: ''Nê ciwîyayîşê îtîqatê xo, qiseynêkerdişê ziwanê xo, bi nasnameyê cinîyan qiseynêkerdiş hêrişê secîye yê. Na raştîye têna ma mecbur kena ke ma cayê yewbînan de vinderê.  Îtîrazê cinîyan, elewîyan û kurdan ke bi serran o dewam kenê tay mendo biresê heqîqetî. Nê welatî de îtîrazî qet nêqedîyayî û ewro semedê ameyoxê hemparî nê vengî dahîna berz vejîyenê. No welat vîneno ke sîstemo ke têna tirkîye û sunîyîye ser o ameyo înşakerdene, rayra nêşino.  Nika wextê qirkerdişan nê, wextê newera roniştiş û qiseykerdişî yo. Wextê çînhesibnayîşî nê wextê newera estbîyayîşê nasnameyan o. Ez sey embaza şima ya elewî  vanan ke gerek elewîyî nê prosesî de vera pêro xîle û polîtîkayanê nêbewlîkerdeyan ê îqtîdarî berpirsîyarîye bîgirê xo ser.''