Platformê Cinîyan ê Çewlîgî reya verêne bajar de çerçeweya 25ê Teşrîna Peyêne Roja Têkoşînî ya Mîyanneteweyî ya Vera Şîdetê Serê Cinîyan de rayraşîyayîşê şewe organîze kerd. Cinîyê ke mehleya Uydukentî de ameyî têhet pankartê ''Bi komelê demokratîkî ver bi cuya azade ya bêşîdete'' akerd. 

Cinîyê ke bi laçikanê xo yê sipîyan tewrê rayraşîyayîşî bîyî heta verê Kalium AVMî rayra şîyî. Çalakîye de sloganê “Jin jiyan azadî”, “Destê ke cinîyan rê benê derg, mela bişikîyê”, “Cînayetê cinîyan polîtîk ê” ameyî vatene.

Badê rayraşîyayîşî Platformê Cinîyan ê Çewlîgî eşkerayîye daye. Bi nameyê platformî Sekretera Egîtîm Senî yê Çewlîgî  Gamze Nur aslan qisey kerd û vat ê do tim bibê vengê pêro cinîyan. Gamze Nur Aslan vat: ''Ma bi mîrasê wayanê Mîrabelan heta ewro cuya azade ya bêşîdetî pîya bi komelê demokratîkî mûnenê. Nê 25ê Teşrîna Peyêne ma hem pê hêrsê cinîyan ke ameyî qetilkerdene hem zî bi hêvîya înşayê haştîye pêşwazî kenê.''

Endama Komîsyonê Semedê Rojîne Kabaîş Edalet Şevvale Tuker vist vîrî ke cinîyî yenê kiştene û sey xokiştişî yenê mojnayene û vat: ''Na herre de bi seyan cinîyî ameyî qetilkerdene û qetilkerdişê înan sey xokiştişî ame mojnayene. Ma tim vat mergê Rojîne xokiştiş nîyo. Eynî sey Şule , sey Gulîstane… Ewro zî ma bi têkoşînê xo no îspat kerd. Bi têkoşînê ma yê meydanan, kampusan û kuçeyan no ame caardene. La nêqedîya têkoşînê ma do vizêrî ra bêro xurtkerdene.''

Eşkerayîye bi slogananê “Jin jiyan azadî” qedîyaye.