Rayber Apoyî mesajê xo ke çarçeweya 25ê Teşrîya Peyêne Roja Têkoşînî ya Mîyanneteweyî ya Vera Şîdetê Serê Cinîyan şawit, nê vatî:

''Komel awanîya sinifa yew tebeqin nîyo, warêkê şerî yo ke bi tebeqanê cîya cîyayan sey tarîh, cînsîyet û sinife ra yeno pê. Problemo verên û tewr pîl yê merdimîye, şorişê verayî yo ke bi kolekerdişê cinîyan dest pêkerd, komelbîyayîşê dormeyê cînî hedef geno. Şîdetê zereyê keyeyî ke ewro ciwîyeno, cinîyetê cinîyan, zextê îqtîdarê camêrdan pêro tesîrê nê hêrişê tarîxkî yo. Awanîya kastîk ke hêrişê komelbîyayîşê dormeyê cinî û komunalîte kerd, dima ra açarîya meclîsê hûmayan ê Mezopotamya, ey ra dima açarîya rahîbanê sumeran û ûca ra açarîya fîravun û kralan û zextê îqtîdarê camêrdan yê vera komelî kerd mende.

Roja ma de cinî hammadeyo tewr erjîyaye yê kapîtalîzmî yo. Bedenê ci yeno bazarkerdene, karekterê ci babeta bazarîye a. Ruhê ci zî ameyo îstîlakrdene, cinîya ke raştê îstîlayê camêrdî ameye, bi xençerêka koletîye ya ke zîhnîyetê îqtîdarê camêrdî daya maneyê ci ro, ciwîyena.

Komelbîyayîşê camêrd hakîmî ke bi şerê medenîyetî yê bi hezaran serran ame pê, ewro zî hîyerarşî, şîdet û pêkewtişan afirneno. Medenîyetê camêrdan o bidewlete ziwan, berardiş, bedenê cinîye û dima ra pêro komel destê ci ra girewt. Heta ke na raştîye nêro vînayene semedê azadîye game nêeşkena bêro eştene.

Problemê ke sîstemê îqtîdarê camêrdî cinî rê dayî ciwîyayene ganî bêrê famkerdene û çareserkerdene. Eke cinayetê vera cinîyan, şîdetê zereyê keyeyî, cîyakarîye bêrê fikîryayene eşkera yeno vînayene ke merhaleya kolebîyayîş zaf gird a.

Cinî bi temamî ameya wardayene. Raştîya ci ameya xeripnayene. Ê halhal û xizmayê ke cinîyî semedê xemilnayîşî  kenê pa pêro îşaretê koletîye yê, sey rêça ci tarîxî ra heta roja ma ameyî. Modernîteya kapîtalîste koletîya cinîyan dahîna kerd xorî, sîstemî cinî açarnaye malzemeyê xeml û bazarîye. Seba ke na koletîya sîstematîkî ra bêro vetene û semedê azadîye xorî fîkîryayîş û rêxistinbîyayîş hewce keno.

Qet hemleyêka azadîye ya komelkî ya ke azadîya cinîyan nêgena merkezê xo, nêeşkena bibo şorişo raşt. Ez tekîlîya cinî camêrd dehşet vînena. Ma azadîya cinîyan girewt merkez û tekîlî çareser kerdî. Zafê xebatê ma xebatê cinîyan ê. Çareserkerdişê tekîlî û nakokîya cinî camêrdî muhîm a. Ma îqtîdarê camêrdî ke azadîya cinîyan asteng keno, cinî bi heme çîyanê ci kole keno, xorî çareser kerd. Ma sosyolojîya azadîye aver berd. Eşkera yo ke cinîbîyayîş zor o, xelisyayîş rehet nîyo la cinî ganî nê rê cesaret bikero. Ganî xençera îqtîdarê camêrdan ke dîyaya maneyê merdimîye ro, vejo û serkêşîya înşakerdişê cuya azade, seyciye û demokratîke bikero.

Abdullah Ocalan''