Hemsereka Pêroyî ya Partîya Demokrasî û Seyyewbînîye ya Şaran (DEM Partî) Tulaye Hatimogullariya ke tewrê programê taybetî yê JIN TVyî bîyî, cewab da persanê Nezahate Dogan.

Tulaye Hatomogullari eşkera kerd ke Rayber Apoyî îşaret kerd derheqê serûberkerdişanê qanûnî de xebatî kewtî erey û waşt wa komîsyon semedê nê têbigêro. Hatimogullari vat Rayber Apoyî vato eke komîsyon şiro girawe o wazeno prosesê muzakereyanê demokratîkan bido destpêkerdene.

Tulaye Hatimogullariya ke derehqê pêvînayîşê Îmraliyî yê vizêrînî de qisey kerd, ard ziwan ke pêvînayîş de proses ame qiseykerdene û erjnayene. Hatimogullari vist vîrî ke wextê destgirewtişê rayberê MHPyî Devlet Bahçeliyî yê 1ê teşrîna verêne ra dima serrêke vîyarte û vat pêvînayîş de serrêkke de çî ame kerdene û çi nêame kerdene, nînan ser ame qiseykerdene.

Tulaye Hatimogullari nê vatî: ''Ez nê vajî Birêz Ocalanî vat ganî hewcadarîyê nê prosesî bêrê caardene. Birêz Ocalanî sey xeylê kombîyayîşan nê kombîyayîşî de zî her kesî ra waşt ke wa cîddî têbigero. Xebatê komîsyonî muhîm ê la ganî serûberkerdişê qanûnû û huqûqî bêrê destpêkerdene. Gorayê ma zaf kewto erey. Birêz Ocalan  zî wina vîneno û xora pêvînayîş peyênî de binê nê zî bitaybetî xêz kerdo. Vato ganî hinî wext nêro vînîkerdene no proses zemînê sîyasîyî de dahîna hêzdar bêro qiseykerdene. Tena goştarîkerdişê komîsyonî qîm nêkeno. Wezîfeyanê tewr muhîman ê komîsyonî ra yew zî falîyetê yasama yê.

Pêvînayîş de ame vatene ke ganî vera yewbînan gamî bêrê eştene.Yanî seba ke gamê pêtî bêrê eştene heyetî do dahîna zaf bikewê mîyanê pêvînayîşêkî. Wird hetî zî semedê gamanê pêtan pozîtîf nizdî benê. Xora ma tim vanê tay gamî ganî vera yewbînan bêrê eştene. Heta nika gama tewr pête yew hetî eşte. Vera nê gamanê pêtan pawitişê ma o yo ke sey sîyasetê demokratîkî yê Tirkîya zî serûberkerdişê qanûnî bêrê kerdene.Yanî derheqê PKKyî ke çeke caverda, serûberkerdişo qanûnî. Ma nê ra vanê 'serûberkerdişo taybet.'

Birêz Ocalan vat 'eke komîsyon bêro tîya ez do înan reyde muzkareyêkê demokratîkî raya berê.' Eynî wextî de wazeno heme hetan de, têna komîsyon nê, pêvînayîş bikero û înan reyde prosesê muzakereyêkê demokratîkî bido destpêkerdene. O bi xo prosesê muzakereyêkê demokratîkî wazeno û vano wazeno nê prosesî bido destpêkerdene. Babetê qanûnî ganî bi cîdîyetê pîlî bêrê destgirewtene. Prosesî sey dergkerdişê vengî vîneno û wazeno wa nê ra peyser game bêro eştene.

Birêz Ocalanî îfade kerd ke seba ke komîsyon de destûr nêdîya dayîkî bi kurdkî qisey bikerî o zaf qehrîyaye û hêrsbîyaye yo. Vato komîsyonêko xora nê semedî ra ameyo ronayene destûr nêdayo  dayîkî kurdkî qisey bikerî, çîyo winayên nîno qebulkerdene.''