16ê sibate de îdarekaranê MÎTî ra Îsmaîl Hakki Pekînî kanala CNN Turkî de qisey kerdbi û vatbi ke ganî Ewropa de îdarekarê KCKyî yê Qendîlî bêrê hedefkerdene. Pekînî qiseykerdişê xo de Qirkerdişê Parisî zî wina îtîraf kerdbi: ''Ewropa de nînan ra tayî estê. Ganî ma nê herêmanê Ewropa de çîyêk bikerê. Erê seke verî Paris de ame kerdene la...''

Avûkatanê dewaya PKKyî ya Belçîka ra Jan Fermonî ANFyî rê qisey kerd û vera bêvengîya Ewropa ya seba gefanê Îsmaîl Hakki Pekînî nêrazîbîyayîşê xo mojna.

Fermonî pare kerd ke ê zanenê Tirkîya Ewropa de çalakîyanê winasênan kena û vat: ''Ganî vera nê îtîrafî Ewropa hetê huqûqî ra çîyêk bikera. Xora no bi hawayêkê zelalî gefwendiş o zî. Nê qiseyî nênê qebulkerdene. Tirkîya de xora merdimê winasênî nêtepişîyenê. Vengdayîşê nê merdimî (Pekîn) skandal o. Sere de Belçîka ganî pêro welatê Ewropa cewabê nê qiseyan bidê.

Ruhî Semen hemkarê tetîkwanê Qirkerdişê Parisî Omer Guneyî bi û eşkera bi ke o hema zî Almanya de dezgehê DÎTÎBî yê Tirkîya de aktîf o.

Fermonî mesele ser o vat welatê Ewropa paştî danê Tirkîya û wina dewam kerd: ''Selahîyetdarê Ewropa bi taybetî meseleya kurdan de zaf paştî danê Tirkîya û vera kurdan proseduranê bêhuqûqîyan anê ca. Ewropa û Tirkîya hemkar ê û na rewşe nêna qebulkerdene. Tirkîya her roje polîtîkayanê xo zêdêr kena agresîf û zelal. Tirkîya Ewropa rê şer îxrac kena. Vateyê Pekînî bitehluke yê. Belçîka de zî kurdan rê gef yeno wendene la ez nêeşkena nînan ser o qisey bikera.''

Hezîrana 2017î de gerreyê kurdan ra dima 3 kesî tepişîyabi. Dima eşkera bi ke nê kesan plan kerdêne ke vera kurdanê sey Hemserekê KONGRA-GELî Remzî Kartaşî sûîkast bikerê. 3 kesî zî wezîfedarê Tirkîya yê.