Serekê MHPyî yo Pêroyî Devlet Bahçelî 1ê teşrîna verêne de meclîsî de destê xo dabî grûba DEM Partî, ê demî ra dima prosesê neweyî yew serra xo temam kerd, labelê hetê îqtîdarê AKPyî ra hema tu gama şênbere nêame eştene.
1ê teşrîna verêne 2024î de Bahçelîyî destê xo da parlamenteranê DEM Partî, no tena protokol nêbî, çareserîya meseleya kurdî rê zî noqteyêka kırîtîke bî. 22ê teşrîna verêne de Bahçelî vat Rayber Apo ganî bêro meclîsî qisey bikero û feskerdişê rêxistina xo beyan bikero, dima "heqê hêvîye" do bêro caardene.
27ê sibate 2025î de heyetê DEM Partî şî Îmrali û "Vengdayîşê Komelê Demokratîkî û Haştîye" yê Rayber Apoyî pare kerd. Rayber Apoyî vat: "Kongreya xo virazê, pêro grûbî ganî çekan verdê û PKK xo fehs bikero." PKKyî zî 1ê adare ra nat adirbest îlan kerd, gulane de xo fesh kerd, 11ê temmuze de merasîmêko sembolîk ê veşnayîşê çekan viraşt.
Çiqas nê gamê tarîxî bêrê eştene zî, îqtîdarê AKPyî operasyonê leşkerî û sîyasîyan dewam kerd. Teşrîna peyêne 2024 ra nat gelekî şaredarîyî xesp bîyî, qeyûmî eştî. Prosesî de Sirrî Sûreyya Onderî ke heyetê Îmraliyî de ca girewtbî 3ê gulane de cuya xo vîndî kerde.
Yew serre de hetê dewlete ra gama tewr şênbere ke ameya eştene, tebaxe de komîsyonê meclîsî awanbîyayîş bî. Serekê Meclîsî Nûman Kurtulmuşî vat êdî goşdarkerdişî qedîyenê, wextê çarçewaya qanûnî yo. Nika 1ê teşrîna verêne de akerdişê meclîsî reyde goreyê komîsyonî regulasyonê qanûnî benê.
