PKK Konvansîyonê (Peymana) Cenevre zî tede tim goreyê norm û peymanan têgêra û esîran rê goreyê na peyman û hîşmendîya xo têgêra. PKKyî tim goreyê rûmetê merdimîye têgêra û esîrî teslîm kerdî. Dewleta tirke Garê de wezîfedarê xo kiştî û PKK kerd sûcdar. La kes pê ci bawer nêbi. Fermandarîya Qerargehê Merkezê Pawitişê Şarî, KCK û HPGyî detayî eşkera kerdî. Endamê Konseya Rayberdişî ya KCKyî Zubeyîr Aydarî venga heyetanê mîyanneteweyîyan da ke serebût ser o cigêrayîş bikerê.

Konvansîyonê Cenevre vera caardişê sûcanê şerî 1949 de ame îmzakerdene. Goreyê konvensîyonan ganî şer de zerar nêro dayene sivîlan û esîran. Tirkîya 1990an ra nata konvensîyonan binpay kena. Garê de zî na rewşe xo dibare kerde. dewleta tirke herinda ke hetkarîya dezgehan ê mîyanneteweyîyan bigêra wezîfedarê xo yê esîrî kiştî.

PKKyî zî Konvensîyonî îmza kerdî

PKKyî 24ê çeleyê 1995î de Cenevre de nameyê Rayberê Şarê Kurdî Abdullah Ocalanî ser o kombîyayîşêkê çapemenîye viraşt û pare kerd ke înan Konvansîyonê Cenevre îmza kerdî.

O çax PKKyî na eşkerayîye dabi:

''Welatê ma Kurdîstan de şerê îmha yeno kerdene. Dewleta tirke estbîyayîşê kurdan tim înkar kerd, ziwan û kulturê kurdan qedexe kerd û nika zî vera kurdan şerê qirkerdişî kena.

PKK seba heqanê demokratîk û mîlîyan ê şarê ma têkoşîn keno. No şer netîceyêka polîtîkayanê dewleta tirke ya. Tirkîya nê şerê gemarinî de kurdî sey hedefê meşrûyî îlan kerdî.

Tirkîya Kurdîstan kerd veng, 3 hezar dewî vêşnayî û bi hezaran merdimî waranê ci ra kerdî. Artêşa ke pê gerîlayan nêeşkaye sivîlan ra qesas gêna. 15 hezar endamê partîya ma nika zîndanan de cezaya îdamî reyde têrî benê.

Tirkîya peymananê mîyanneteweyîyan binpay kena û asteng kena ke çimdarîyê heqanê merdiman û AGIT Kurdîstan zîyaret bikerê, rewşe biercnê. Dewlete xîretê winasênî yê Komîteya Xaçê Sûrî ya Mîyanneteweyî (ICRC)red kerdî. Tirkîya qet goreyê Peymana Cenevre tênêgêraye û îmzakerdişê Protokolê Verênî yê 1977î red kerd.

Şerê 10 serran de 34 hezar kesî merdî. No şer weçînayîşê ma nêbi. Ma wazenê no şer biqedo. Ma terefgîrê çareserîya têdûşt, demokratîk û huqûqî yê. No waştişê ma pê adirbirnayîşanê 1993î ame îsbatkerdene. Tirkîya şerê gemarinî de isrardar a.

Heta ke Tirkîya bigêra çareserîyêka sîyasî ma do şer dewam bikerê. Ma venga Tirkîya danê ke wa goreyê peymanan têbigêra û hêrişanê vera sivîlan vindarna. PKK tim goreyê konvensîyonan têgêra. Muracatê seba naye 23ê çeleyê 1995î de nameyê Sekreterê pêroyî yê PKKyî Abdullah Ocalanî ser o ICRC û dezgehanê bînan rê ame kerdene.

Beyanname de nê noqtayî zî ca gênê:

1-PKK mesuldarîya ci gêno xo ser ke Peymana Cenevre ya 1949î û Protokolê Yewinî yê 1977î rê hûrmet bikero, şertanê ci waranê xo de bîyaro ca.

2-Seba ke şikêk nêvirazîyo PKK nê grûbanê cêrinan sey parçeyanê hêzan ê tirkan û coka hedefanê xo yê meşrûyan vîneno:

a - Endamê hêzan ê çekdaran ê tirkan (TSK)

b - Endamê hêzan ê kontragerîlayan ê tirkan

c - Endamê Servîsê Îstîxbaratî yê Tirkîya (MÎT)

d -Endamê cendirmeyan ê tirkan

e - Qoricîyê dewan

PKK nînan ra ber karmendê bînî sey hêzanê asayîşî nêvîneno.

3-Pêro endamê hêzan ê tirkanê ke tepişîyenê, PKK do nînan rê muameleyê 'esîrê şerî' bikero.

4-PKK do na eşkerayîye, şertanê Peymana Cenevre û Protokolê Yewînî yê 1977î cade mîyanê hêzanê xo de vila bikero û ICRCyî ra hetkarî biwazo. PKK seba ke nê şertî bêrê caardene û binpay nêbê sîstemêkê dîsîplînî û krîterê mesuldarîya îdereyî qebul keno. PKK do pêşnîyazê xizmetî yê ICRCyî qebul bikero.

5-PKK venga hukmatê tirkî dano ke heman sozan bido û pêşnîyazê xizmetî yê ICRCyî qebul bikero.

Tewr peynî; PKK venga Peymana Cenevre, Neteweyanê Yewbîyayeyan, AGIT, Konseya Ewropa û ICRCyî dano ke wa şer biqedînê yan zî seba ke dewleta tirke û PKK hûrmetê çarçewa mesuldarîyanê xo de têbigêrê gamanê hewceyan bierzê.