Hemserekanê KNKyî Zeynebe Morad û Ahmed Karamusî mektubêko akerde Serekê Herêma Kurdîstanî Nêçirvan Barzanî, Serekwezîrê Herêma Kurdîstanî Mesrûr Barzanî, Serekê Partîya Demokrate Kurdîstanî (PDK) Mesud Barzanî, Hemserekanê Yewîya Niştimanîya Kurdîstanî (YNK) Lahor Şêxcengî û Bafel Talabanî û hemserekanê Koma Komelanê Kurdîstanî (KCK) Besê Hozat û Cemîl Bayikî tê nuşt.

Mektub wina yo:

''Çend rojî verê cû herêma Zînî wertê mabênê hêzanê PDKyî û YNKyî de bîye sebebê alozîye. Dima zî alozîye mabênê HPG û pêşmergeyanê PDKyî de vejîyaye. Na alozîye eşkena biba semedê şerêkê zereyî.Dişmeno sereke dewleta tirke nika ra nê sey firsend xebitnena, herême dana bombayan ver û nakokîye xorin kena. Dewleta tirke her serre beşêkê erdê Başûrî îşxal kena û baregehanê leşkerîyan tede awan kena. Planê dewleta tirke çinkerdişê pêro destkewteyanê şarê kurdî yo. Ganî pêro hêzanê Kurdîstanî na raştîye bivînê û vera nê îşxalkeran tewirêk bimojnê. Seba ke mîyanê kurdan de şerêkê zereyî nêvejîyo û destkewteyê şarê kurdî çin nêbê ganî rewşêka winasêne nêra meydan. Na rewşe têna zerrîya dişmenan rehet kena. Ganî ma sey sîyasetmedar, dezgehanê komelî, hunermend, roşnvîr û akademîsyenan berpirsîyarî bigêrê.

Bêşik pawitişê sînoranê herêma Kurdîstanî wezîfe û berpirsîyarîya hukmatê herême yê. Bi nê hawayî wezîfe û berpirsîyarîyêka pîle û tarîxîye kewenê milê Serek û Hukmatê Herêma Kurdîstanî. Ganî PDK, YNK û PKK zî xo sey berpirsîya bivînê. Na çarçewe de eke estbîyayîş û çinbîyayîşê şarê kurdî bikewê binê tehlukeyî ganî PDK, YNK û PKK menfaatê partî, makokîyan bidê kişte. Seba pawitişê destkewteyanê şarê xo yewvengîya xo xurt bikerê. Şarê ma, dostê ma yewvengîya ma wazenê. Şerê zereyî qebel nêkenê. Hêverî ma wazenê ka ganî hêzê ke şîyî Zînî Wertê abigêrê cayê xo yê verênî û propagandaya dişmene ya medya bêra vindertene. Ma venga Hukmatê Herême, PDK, YNK û PKKyî danê ke dest pê dîyalogî bikerê ke nakokî û alozîye bêrê çareserkerdene. Ganî na biba wesîleya yewvengîya ma. Ma têna bi nê hawayî eşkenê planê dişmenî werte ra wedarê.