Endamê Komîsyonê Demokrasî, Wayûbiratîye û Paştdayîşê Mîllîyî û Wekîlê DEM Partî yê Îstanbulî Celal Firatî ANFyî rê qisey kerd.

Celal Firatî nê vatî: ''Semedê ma şertanê bingeyînan ê haştîye ra yew o yo ke muxatê na mesele de pêvînayîş bêro kerdene. Îradeyo ke Birêz Abdullah Ocalan heta ewro semedê çareserîye ramojna yo, çew nêeşkeno înkar bikero. Komîsyon semedê averşîyayîşî ganî nê îradeyî bivîno. Eslê xo de semedê nê astengêk çîn o. Xora vervatoxanê Îtîfaqê Cumhurî zî vatbi heyetêk eşkeno şiro Îmrali. Semedê nê serûberkerdişo huqûqî hewce nêkeno, têna ganî îradeyo sîyasî qerardar bo. Ma sey DEM Partî seba ke na qerardarîye bêro ramojnayene cehdkerdişê xo rê dewam kenê.

Senî ke Tuncer Bakirhanî zî vat, ma nê raşt nêvînenî ke averşîyayîşê Sûrîye seemedê haştîya zereyî ya Tirkîya sey şertî bêrê mojnayene.Serekê Meclîsî vano wa pêro awanî çeke ronê. Bi nê vatişan yeno waştene ke proses bêro dergkerdene. Haştîya zereyî ya Tirkîya pabestişê dînamîkanê teberî, tewirêko raşt nîyo. No çareserî fîneno erey, keno giran, verê ci geno. Ma haştîya zereyî semedê menfeatê pêro şaranê Tirkîya vînenê. Coka ma vanê wa problemê Sûrîye cîya bêrê destgirewtene.

Par 1ê teşrîna verêne de pîya bi akerdişê meclîsî Birêz Devlet Bahçelîyî destê xo kerd derg û Birêz Abdullah Ocalanî bi qedînayîşê têkoşînê çekdarî yê rêxistine cewab da nê. Emser Birêz Serekkomarî sereakê partîyan de pêvînayîş kerd û destê înan girewt, no zî mojneno ke proses do dewam bikero. Hinî wezîfê meclîs de yo. Pawitişê ma o yo ke qanûnê entegrasyonî lezabez bikewê dewre. Ganî caardişê qeyûmî biqedîyêû wezîfeyê pêro hemşaredaran bêro îadakerdene. Gamê winayênî prosesê çareserî xurtêr kenê.''