Dêrsim de Festîvala Kultur û Xoza ya Munzurî ya 23yîne emser bi şîarê ‘’Dêrsim cu ya; Destê xo medê ziwan, bawerî, îrade û xozaya mi’’ yena kerdene. Çarçeweya festîvale de bi sernameyê ''Averşîyayîşê Rojhelatê Mîyanênî , Meseleya Kurdan, Haştîye û Çareserîya Demokratîke'' panel ame kerdene.

 Panelo ke Kuçeyê Hunerî de ame kerdene moderatorîya co rojnameger Ergin Dogruyî kerd.Temsîlkarê ESP, EMEP, SMF û DEM Partî sey qiseykerdoxan tewrê panelî bîyî. Qiseykerdoxan vat prosesê pêkewtişan ê Rojhaletê Mîyanênî gerek bi rayîrê çareserîya haştîyane bêro destgirewtene.

Wekîlê DEM Partî yê Îstanbulî Cengiz Çîçekî nê vatî: ''Gerek ma her  ca de têkoşîn bikerê û derdê ma rêxistinkerdişê ma bo. Tirkîya de xora huqûq nîno caardene. Eke çew bibo hêzo polîtîk o wext çew eşkeno hêzê vera xo rê game bido eştene. Ne Amed de ne zî Îstanbul de demokrasî est a. Goreyê mi Birêz Ocalan wazeno ke semedê bindestanê nê welatî warê polîtîkî abikero. Waro polîtîka ame tengkerdene. Coka rayîro ke têgêrayîşê kurdan wazeno a bikero do semedê bindestan, kesanê ke têkoşînê azadîye û demokrasî rayra benê waro polîtîk abikero.

Ez sey kesêkî şîya Îmrali vana ke Birêz Ocalan zaf şertanê zehmetan de nê karî rayra beno. Seba ke Birêz Ocalan rolê xo bîyaro ca gerek azadîya ci ya fîzîkîye bêro caardene. Heta ke no tecrîd dewam bikero çîyo ke Îmraliyî ra reseno rayapêroyîye şiknaye şino. Peynîya roje de semedê her kesî yew Ocalan est o la Ocalan bi xo çîn o.  Ma sey şorişgêran, kesanê ke demokrasî û haştîya komelkî wazenê, caardişê azadîya fîzîkîye ya Birêz Ocalanî wezîfeyê ma yo.''