Hemserekîya Konseya Razberdişî ya KCKyî, serrgêra 10. ya hêrîşê bombeyî yê Mîtîngê Kede, Haştîye û Demokrasîye de ke 10ê teşrîna verêne 2015î de Ankara de Îstasyonê Trêne ver de ame kerdene, beyanatêko nuştekî vila kerd. Beyanatî de ame vatene ke qetilkerdişo ke 100 ra zêdeyêr însan merdbî, serebûdanê dewlete yê tarîyan ra yew o. KCKyî îfade kerd ke xeyalê haştîye û cuya demokratîke yê şehîdanê 10ê teşrîna verêne têkoşînê şaran de yeno ciwîyeno û vat: "Prosesê Haştîye û Komelê Demokratîkî, prosesê resnayîşê xeyalanê şehîdanê 10ê teşrîna verên o."

Beyanatê Hemserekîya Konseya Rayberdişî ya KCKyî wina yo:

"10ê teşrîna verêne 2015î de Ankara de Îstasyonê Trêne ver de Mîtîngê Kede, Haştîye û Demokrasîye de ame kerdene, hêrîşî mîtîngî de 100 ra zêdeyêr şarê ma yo welatperwer û demokrat şehîd bîyî, bi seyan kesî zî birîndar bîyî. No qetilkerdişo bêrûmet ke vera wayûbîratîya şaran, xeyalê cuya demokratîke û hempare ame kerdene, serrgêra 10. de ma reyna bi hêrsêko girs şermizar kenê, merdeyan bihurmet yad kenê. Xeyalê înan ê wayûbîratîya şaran, haştîye, azadîye û cuya demokratîke têkoşînê şaranê ma de ciwîyeno û rêça xo ya serkewtişî dewam kena. Ma reyna eşkera kenê ke bi qetilkerdişanê gondaran xeyalê haştîye, azadîye û wayûbîratîye yê şaran nêeşkenê bêro qedênayene. Tirkîya de ke demokratîkbîyayîş awan beno, xeyalê cuya azade, seypêye û hemparîye ya şarê tirk, kurd û heme şaran nêeşkeno bêro astengkerdene.

Qetilkerdişêko dewlete ser o

Qetilkerdişê Îstasyonî, qetilkerdişêko tarî yo ke kontrolê dewlete de ame kerdene. 10 serrî vîyartî zî la qetilkerdiş pêro hetan ra nêame roşnkerdene, no, rolê dewlete û îqtîdarî yê qetilkerdişî eşkera keno. Qetilkerdişo ke DAÎŞî kerd dewlete û îqtîdarî tira pak nêkeno. Zaf hêrîş û qetilkerdişan de DAÎŞ ame şuxulnayene.

No qetilkerdiş vera şarê kurdî 10 serran ra ver ameye kerdene û bî destpêkê şerî û no mojneno ke peyê hêrîşî de yew rayberîye est bîye. Weçînayîşanê 7ê hezîrane û 1ê teşrîna peyêne ra ver wina zaf qetilkerdişî sey tesadufêk nêeşkenê bêrê qebulkerdene. Na çalakîya tarîxî ya xebatkaran, cinîyan û gelek dezgehanê komelanê demokratîkan tarîxê têkoşînê demokrasî û azadîye yê Tirkîya de seba vindarnayîşê şerî û temînkerdişê haştîye hertim do bêra yadkerdene.

Hedef resnayîşê xeyalan o

10 serrî yo zordestîyî şarê kurdî û qewetê demokrasîye yê Tirkîya ser o nêeşkayî ser bikewê, vera ney de nê polîtîkayî Tirkîya waranê sîyasî, komelkî, ekonomîk û dîplomatîkî de teng kerdî. Şarê ma nê 10 serran de bedelê giranî dayî labelê têkoşînê demokrasî, azadîye û haştîye ca nêverda. Netîceyê nê têkoşînî de bi înîsyatîfê Rayber Apoyî Prosesê Haştîye û Komelê Demokratîkî dest pêkerd. Hedefê prosesî vernîya resnayîşê xeyalanê şehîdanê qetilkerdişê 10ê teşrîna verên o. No proses wexto ke bireso serkewtişî bedelê giranê ke şehîdanê ma bi cuya xo dayî, do hîna manalîdar bibê.

Seba ney heme şarê ma û dostê ma ganî têkoşînêko aktîf bikerê seba ke Prosesê Haştîye û Komelê Demokratîkî bireso serkewtişî. Cewabo tewr raşt ke ma eşkenê bidê vîrameyîşê merdeyanê qetilkerdişan no yo. Bi nê fikr û bawerîye ma reyna şehîdanê Qetilkerdişê Îstasyonî bihurmet yad kenê û soz danê ke ma do vîrameyîşê înan têkoşînê xo de bidê cieîyayene û xeyalê înan biresnê serkewtişî."