Lezgîn Botanî prosesê "Haştî û Komelê Demokratîkî" yo ke bi beyanatê 27ê sibate yê Rayber Apoyî dest pêkerdo, nirxna. Vat, şarê kurdî û têgêrayîşê sîyasî yê kurdî fedakarîyê nepawiteyî kerdî labelê nê hewlî tena yew hetî ra şonê û vera ey de dewlete gamê şêberî nêeştî.

'Komîsyonê meclîsî muhîm o labelê bes nîyo' 

Botanî vat meclîsî de rey verêne komîsyono ke temsîlkarê pêro partîyan tede est ê, awanbîyayîş muhîm o: "Mesele binê banê meclîsî de bi beşdarîya pêro aktoranê sîyasîyan munaqeşeyê ci zî muhîm o."

Botanî vat komîsyon 2013-2015î de goreyê "Heyetê Akîlî" temsîlîyetêko berzêr gêno xo ser labelê waştişê şarê kurdî û komelî ra dûrî ya. Proses zaf krîtîk û muhîm o, tena komîsyonê meclîsî ser o nêeşkeno bêro ramitene.

'Azadîya Ocalanî şerto bingeyin ê haştîye yo' 

Botanî vat komîsyon tena goşdarkerdişan reyde wezîfeyê xo nêeşkeno biqedîno, ganî cigêrayîşanê xo bikero taslax û bişawo meclîsî rê.

Seba ke îradeyê haştîye temam bibo ganî Rayber Apo mutleq azad bo: "Birêz Abdullah Ocalan, nameyê şarê kurdî ser o muzakereger o. Hetê kurdî û şarê kurdî nê warî de qerar dayo. O wext hem ey hem zî embazanê Îmralîyî ganî azad bibê û şertanê serbestan de êdî her kesî reyde bieşkê qisey bikerê."

Botanî vat konjunkturê 2013-2015î bi pêroyî vurîya, dinya û mintiqa de hemsengîyê qewetinî yê neweyî virazîyayî. Şarê kurdî konjunkturê nikayênî de avantajêko girdêr gêno. Tirkîya eke goreyê konjunkturê kehenî hereket bikero do zaf vîndî bikero.

"Waştişê meşrû yê şarê kurdî est ê; hemwelatîya qanûnê bingeyinî ra hetanî statuyê xusûsî, federasyon. Nê pêro ganî rehetî reyde munaqeşe bibê û qisey bibê."