Bayrampaşayê Îstanbulî keyeyêko kurd seba ke kurdkî muzîk goştarî kerd raştê hêrişê polîsan amebi. Xeylê bajaranê Kurdîstan û Tirkîya de hêrişê polîsan ame protestokerdene  û ame vatene ke hêrişê vera kurdkî û cinîyan sîstematîk ê.

Amed de bi vengdayîşê Platformê Dezgehanê Demokratîkan qezaya  Yenişehîrî de eşkerayîye ameye dayene. Temsîlkarê partîyanê sîyasîyan, rêxistinanê  qirseyê demokratîkî, dezgehanê ziwan û kulturî û xeylê kesê bînî tewrê ci bîyî. Eşkerayîye de parkartê “Zimanê me, stranên me, govenda me hebûna ma ye destê xwe jê vekişînin” ame akerdene û sloganê sey “Zimanê me hebûna me ye”, “Jin jiyan azadî”, “Bijî Serok Apo”, “Bê ziman jiyan nabe” ameyî vatene.

Eşkerayîye kirmanckî hetê Hemsereka Komelê Cigêrayîşê Ziwan û Kulturî yê Mezopotamya Şukrane Yakut, kurmanckî zî hetê Îdarekarê DBPyî yê Amedî  Mehmet Aslanî ra ameye wendene.

Eşkerayîye de nê ameyî vatene: ''Hêrişê vera ziwanê kurdkî û muzîkê ci eslê xo  de vera nasname û estbîyayîşê kurdan ê.  Ziwan û kulturê kurdkî nasname û rumetê şarê kurdî yo. Ma sey dezgehanê ziwan û kulturê kurdan no hêriş zî tede heme hêrişanê vera ziwan û kulturê kurdan şermezar kenê û veng danê berpirsîyaran ke wa kerdoxê nê hêrişî bêrê cezakerdene. Hêrişê winayênî warê haştîye jehr kenê. Haştîye bi naskerdişê huqûqê yewbînan û yewbînan rê hurmetkerdişî bêna. Ma do vera nê hêrişî bêveng memanê. Ma şîdetê camêrdê serdestî şermezar kenê. Ma do tim semedê pawitişê ziwanê kurdkî têkoşîn bikerê.''

Reyna Şirnex,Êlih, Sêrt, Semsûr, Îstanbul, Anqara de zî hêrişê vera kurdkî ameyî protestokerdene û semedê wayîrvejîyayîşê kurdkî ame vengdayene.